ਹੀਰ ਆਖਦੀ ਸਹਿਤੀਏ...

ਹੀਰ ਆਖਦੀ ਸਹਿਤੀਏ ਬੱਚ ਕੇ ਰਹੀਂ, ਇਹ ਕਲੱਰਕ ਨਾ ਕਿਸੇ ਦੇ ਸੱਕੇ ਭੈਣੇ।
ਕੁੱਤੇ ਤਾਈਂ ਤਾਂ ਕੱਕਾ ਹੈ ਇੱਕ ਲੱਗਦਾ, ਲੱਗਦੇ ਕਲੱਰਕ ਨੂੰ ਦੋ ਨੇ ਕੱਕੇ ਭੈਣੇ।
ਕੁੱਤਾ ਕਰਦਾ ਕਾਰਵਾਈ ਇੱਕ ਪਾਸੇ, ਕਲੱਰਕ ਦੋ ਪਾਸਿਆਂ ਤੋਂ ਡੱਕੇ ਭੈਣੇ।
ਜਿਹੜਾ ਲਾਂਵਦਾ ਫਾਈਲ ਨੂੰ ਨਹੀਂ ਪਹੀਏ, ਫਾਈਲ ਉਸ ਦੀ ਪਰਾਂ ਨਾ ਧੱਕੇ ਭੈਣੇ।
ਗ੍ਰੰਥੀ ਸਿੰਘ ਤਲਾਅ...
ਗ੍ਰੰਥੀ ਸਿੰਘ ਤਲਾਅ ਵਿੱਚ ਸੁੱਟ ਦਿੰਦੇ, ਗੁਰਦੁਆਰੇ ਜੇ ਅੱਜ ਕੱਲ੍ਹ ਭਾਨ ਚੜ੍ਹ ਜੇ,
ਕੁਝ ਆਦਮੀ ਇਸ ਤਰ੍ਹਾਂ ਦੇ ਦਿੰਦੇ, ਜਿਉਂ ਕਿਰਾਏ 'ਤੇ ਕੋਈ ਮਕਾਨ ਚੜ੍ਹ ਜੇ।
ਕਲਾਕਾਰੀ ਹੈ ਬੰਦੇ 'ਚੋਂ ਖਤਮ ਹੁੰਦੀ, ਜਦੋਂ ਸਿਰ ਨੂੰ ਉਸ ਦੇ ਗੁਮਾਨ ਚੜ੍ਹ ਜੇ।
ਬੰਦਾ ਸਹੀ ਇਨਸਾਨ ਬਣਦਾ ਖੁਦ ਜਦ ਉਹ ਨਜ਼ਰ ਆਪਣੀ ਵਿੱਚ ਪਰਵਾਨ ਚੜ੍ਹ ਜੇ।
ਜ਼ਜ਼ਬਾ ਪਿਆਰ ਦਾ...
ਜ਼ਜ਼ਬਾ ਪਿਆਰ ਦਾ ਨੇ ਜਿਹੜੇ ਲੋਕ ਰੱਖਦੇ, ਉਹ ਟੁੱਟ ਕੇ ਕਦੇ ਵੀ ਬਿਖਰਦੇ ਨਹੀਂ।
ਕਸ਼-ਮ-ਕਸ਼ ਤੋਂ ਜਿਹੜੇ ਨੇ ਦੂਰ ਰਹਿੰਦੇ ਸਖਸ਼ ਜ਼ਿੰਦਗੀ ਵਿੱਚ ਉਹ ਨਿਖਰਦੇ ਨਹੀਂ।
ਸਿਦਕ ਵਾਲਿਆਂ ਤਾਈਂ ਡੁਲਾ ਸਦੇ, ਇਹ ਕਦੇ ਦੁਪਹਿਰੇ ਤਿਖਰ ਦੇ ਨਹੀਂ।
ਪੌੜੀ ਟੁੱਟੀ ਹੋਈ ਲੋਕ ਰਾਜ ਵਾਲੀ, ਡੰਡੇ ਮਿਲਦੇ ਸਾਨੂੰ ਸਿਖਰ ਦੇ ਨਹੀਂ।
ਗਏ ਮਿੱਤਰ ਪਿਆਰੇ...
ਗਏ ਮਿੱਤਰ ਪਿਆਰੇ ਨਾ ਆਏ ਮੁੜਕੇ ਰੱਖੇ ਅੱਖਾਂ ਦੇ ਵਿੱਚ ਸਮੋ ਕੇ ਜੀ।
ਕੰਮ ਆਉਣ ਨਾ ਭੋਰਾ ਸ਼ਰੀਫ ਬੰਦੇ ਉਮਰ ਕੱਢ ਲੈਂਦੇ ਬੂਹਾ ਢੋ ਕੇ ਜੀ।
ਬੇੜੀ ਉਨ੍ਹਾਂ ਦੀ ਹੀ ਪਾਰ ਪਹੁੰਚਦੀ ਹੈ, ਜਿਹੜੇ ਰਹਿੰਦੇ ਨੇ ਕਿਸੇ ਦੇ ਹੋ ਕੇ ਜੀ।
ਸਾਡੇ ਪਿੰਡਾਂ 'ਚ ਆਉਂਦੀਆਂ ਰੋਜ ਚੋਣਾਂ, ਨੇਤਾ ਤੁਰ ਜਾਂਦੇ ਸਾਨੂੰ ਚੋ ਕੇ ਜੀ।
ਹਨ੍ਹੇਰੀ ਤੇਜ ਵਿੱਚ...
ਹਨ੍ਹੇਰੀ ਤੇਜ ਵਿੱਚ ਨਾ ਉਡਾ ਗੁੱਡੀ, ਕੱਚੇ ਧਾਗੇ ਦੀ ਟੁਟਜੂ ਡੋਰ ਬੀਬਾ।
ਬਦਲੇ ਹੋਏ ਸਮੇਂ ਅਨੁਸਾਰ ਹੀ ਹੁਣ ਤੈਨੂੰ, ਬਨਾਉਣੀ ਪੈਣੀ ਪਤੰਗ ਹੈ ਹੋਰ ਬੀਬਾ।
ਲਾਲਚ ਕਰੀਂ ਨਾ ਨਵਿਆਂ ਦੋਸਤਾਂ ਦਾ, ਭਾਵੇਂ ਦਿਲ ਯੇਹ ਮਾਂਗੇ ਹੈ ਮੋਰ ਬੀਬਾ।
ਰਹੀਂ ਬਚ ਕੇ ਬੰਦੇ ਵਿੱਚ ਹੋਰ ਬੰਦੇ, ਕਈ ਹੁੰਦੇ ਨੇ ਆਦਮਖੋਰ ਬੀਬਾ।
ਆਪੇ ਆਵਣੇ ਮੇਮਣੇ...
ਆਪੇ ਆਵਣੇ ਮੇਮਣੇ ਨਹੀਂ ਚਰਕੇ, ਰੱਬ ਉੱਤੇ ਇਹ ਝੂਠੀਆਂ ਡੋਰੀਆਂ ਨੇ।
ਰਾਹਾਂ ਵਿੱਚ ਨੇ ਬੜੇ ਬਘਿਆੜ ਬੈਠੇ, ਜਿਨ੍ਹਾਂ ਫਸਲਾਂ ਤੇਰੀਆਂ ਭੋਰੀਆਂ ਨੇ।
ਗਧੀਗੇੜ ਪਾ ਕੇ ਤੈਨੂੰ ਕਿਸਮਤਾਂ ਦੇ, ਤੋਰੀ ਫੁਲਕੀਆਂ ਵਿਹਲੜਾਂ ਤੋਰੀਆਂ ਨੇ।
ਡੇਰਾ ਡਾਂਗ 'ਤੇ ਰੱਖਣਾ ਸਿੱਖ ਲੈ ਹੁਣ, ਤੈਨੂੰ ਮਾਰਿਆ ਸਿਰਫ ਕਮਜ਼ੋਰੀਆਂ ਨੇ।
ਪੰਜੇ ਅਹਿਮ ਜ਼ਜ਼ਬੇ...
ਪੰਜੇ ਅਹਿਮ ਜ਼ਜ਼ਬੇ ਨੇ ਜ਼ਿੰਦਗੀ ਦੇ ਜਿਉਣ ਦੇ ਲਈ,ਮਿੱਟੀ ਹੈ ਮਨੁੱਖ ਕਾਮ, ਮੋਹ, ਹੰਕਾਰ ਬਿਨਾਂ।
ਕਾਮ ਤੋਂ ਉਤਪਤੀ ਆਨੰਦ ਦੀ ਸਖਰ ਕਾਮ, ਜ਼ਿੰਦਗੀ ਨਿਰਾਰਥਕ ਹੋ ਜਾਂਦੀ ਹੈ ਪਿਆਰ ਬਿਨਾਂ।
ਮੋਹ ਨਾਲ ਰਿਸ਼ਤੇ ਤੇ ਮੋਹ ਹੀ ਸਾਨੂੰ ਜੋੜਦਾ ਹੈ,ਮਨੁੱਖਤਾ ਦੀ ਹੋਂਦ ਕਿਵੇਂ ਰਹੂ ਪਰਿਵਾਰ ਬਿਨਾਂ।
ਜ਼ੁਲਮ ਹੁੰਦਾ ਦੇਖ ਜੀਹਨੂੰ ਆਂਵਦਾ ਕਰੋਧ ਹੈ ਨੀ, ਥੁੜਿਐ ਕੀ ਇੱਥੇ ਉਸ ਆਦਮੀ ਬੇਕਾਰ ਬਿਨਾਂ।
ਮੁੱਖ ਭੂਮਿਕਾ ਨਿਭਾਉਂਦੈ...
ਮੁੱਖ ਭੂਮਿਕਾ ਨਿਭਾਉਂਦੈ ਲਾਲਚ ਵਿਕਾਸ ਵਿੱਚ,ਵੱਧ ਸਕੇ ਅੱਗੇ ਨਾ ਕੋਈ ਲੋਭ ਦੇ ਵਿਚਾਰ ਬਿਨਾਂ।
ਆਪਣੇ ਕੀਤੇ ਤੇ ਹੁੰਦੈ ਗਰਬ ਮਨੁੱਖ ਤਾਈਂ, ਖੁਸ਼ੀ ਪ੍ਰਗਟਾ ਨਾ ਸਕੇ ਬੰਦਾ ਅਹੰਕਾਰ ਬਿਨਾਂ।
ਤਿਆਗੀ ਹੋ ਕੇ ਜੰਗਲਾਂ 'ਚ ਬੈਠਣਾ ਹੈ ਬੇਵਕੂਫੀ,ਆਦਮੀ ਇਕੱਲੇ ਦੀ ਨਹੀਂ ਹੋਂਦ ਸੰਸਾਰ ਬਿਨਾਂ।
ਕਪਟ ਦੇ ਸ਼ੋਰ ਅਤੇ ਜ਼ੁਲਮ ਦੇ ਖਿਲਾਫ ਬੰਦਾ,ਲੜ ਕਦੇ ਸਕਦਾ ਨਾ ਕਰੋਧ ਦੀ ਕਟਾਰ ਬਿਨਾਂ।
ਕਾਮ, ਕਰੋਧ, ਲੋਭ...
ਕਾਮ, ਕਰੋਧ, ਲੋਭ ਸੰਤ ਕਹਿੰਦੇ ਭੈੜਾ ਬਚੋ ਇਹ ਤੋਂ,ਕੋਠੀਆਂ ਦੀ ਸ਼ੁਰੂ ਕਰੀ ਰੱਖਦੇ ਉਸਾਰੀ ਏ।
ਲੋਕਾਂ ਤਾਈਂ ਕਹਿੰਦੇ ਮਾਇਆ ਨਾਗਣੀ ਮਹਾਂਪੁਰਸ਼,ਆਪ ਸੱਤ ਲੱਖ ਵਾਲੀ ਰੱਖਦੇ ਸਵਾਰੀ ਏ।
ਅਸਲ 'ਚ ਸਾਰੇ ਵੋਟ ਬੈਂਕ ਨੇ ਨੇਤਾਵਾਂ ਦੇ ਇਹ, ਆਂਵਦੇ ਵਜ਼ੀਰ ਇਨ੍ਹਾਂ ਕੋਲ ਵਾਰੋ ਵਾਰੀ ਏ।
ਅੰਧ-ਵਿਸ਼ਵਾਸੀ ਸੀਰੀਅਲ ਨੇ ਦਿਖਾਈ ਜਾਂਦੇ,ਕਦੇ ਅਲਫ ਲੈਲਾ ਕਦੇ ਕ੍ਰਿਸ਼ਨ ਮੁਰਾਰੀ ਏ।
ਕੁਝ ਅਨਪੜ੍ਹਤਾ ਨੇ ਕੀਤਾ ਨੁਕਸਾਨ ਸਾਡਾ, ਰਹਿੰਦੀ ਖੂੰਹਦੀ ਮੱਤ ਸਾਡੀ ਹਾਕਮਾਂ ਨੇ ਮਾਰੀ ਏ।
ਸੁਰਗਾਂ ਦੇ ਲਾਰੇ...
ਸੁਰਗਾਂ ਦੇ ਲਾਰੇ ਲਾ ਕੇ ਸਾਧ ਅਤੇ ਨੇਤਾ ਗਣ,ਭੋਲੀ ਭਾਲੀ ਜੰਤਾ ਦਾ ਸ਼ਿਕਾਰ ਕਰੀ ਜਾਂਦੇ ਨੇ।
ਅਗਲੇ ਜਨਮ ਦੇ ਵਿਖਾ ਕੇ ਸਬਜ਼ਬਾਗ,ਸਾਡਾ ਇਹ ਜਨਮ ਹੀ ਖੁਆਰ ਕਰੀ ਜਾਂਦੇ ਨੇ।
ਨੇਤਾ ਨਾਹਰਾ ਲਾਉਂਦੇ ਇਸ ਧਰਤੀ ਤੇ ਸਵਰਗਾਂ ਦਾ,ਵੋਟਾ ਲੈ ਕੇ ਲੋਕਾਂ ਤੋਂ ਬਹਾਰ ਕਰੀ ਜਾਂਦੇ ਨੇ।
ਸਾਧ ਅਤੇ ਨੇਤਾ ਇੱਕ ਦੂਸਰੇ ਦੇ ਯਾਰ ਪੱਕੇ ਨੇ,ਇੱਕ ਦੂਸਰੇ ਦਾ ਪਰਚਾਰ ਕਰੀ ਜਾਂਦੇ ਨੇ।
ਕੂੜ ਹੈ ਸੁਰਗ...
ਕੂੜ ਹੈ ਸੁਰਗ, ਕੂੜ ਅਗਲਾ ਜਨਮ, ਰੱਬ,ਸੱਚ ਹੈ ਸਿਰਫ ਸਾਹਮਣੇ ਜੋ ਦਿਸੇ ਜੱਗ ਪਿਆਰੇ।
ਸੱਚ ਹੈ ਇਹ ਮੋਹ, ਮਾਤ ਪਿਤਾ, ਧੀਆਂ ਪੁੱਤ ਸੱਚ,ਸੱਚ ਹੈ ਬਲ ਰਹੀ ਪੇਟ ਵਿੱਚ ਅੱਗ ਪਿਆਰੇ।
ਵਿਹਲੜ ਨਿਖੱਟੂ ਜੋ ਡਰਾਵੇ ਦਿੰਦੇ ਨਰਕਾਂ ਦੇ,ਸਾਡੀ ਉਹ ਕਿਰਤ ਨੇ ਡਰਾ ਕੇ ਰਹੇ ਠੱਗ ਪਿਆਰੇ।
ਰਾਹ 'ਚ ਵਿਕਾਸ ਦੇ ਇਹ ਸਾਰੀਆਂ ਰੁਕਾਵਟਾਂ ਨੇ,ਕਹਿੰਦੇ ਨੇ ਜੋ ਦੁਨੀਆਂ ਹੈ ਸਾਬਣ ਦੀ ਝੱਗ ਪਿਆਰੇ।
ਕਰਮ ਕਰੋ ਤੇ ਇੱਛਾ ਫਲ ਦੀ ਨਾ ਕਰੋ ਕਹਿੰਦੇ,ਬੱਸ ਬਣੇ ਰਹੋ ਅੰਨ੍ਹੇ ਅਤੇ ਲਾਈ ਲੱਗ ਪਿਆਰੇ।
ਤੇਰਿਆਂ ਹੱਕਾਂ ਤੇ ਡਾਕਾ ਮਾਰੀ ਜਾਂਦੇ ਸਦੀਆਂ ਤੋਂ,ਹੋ ਕੇ ਹੁਣ ਸੁਚੇਤ ਸਾਂਭ ਆਪਣੀ ਤੂੰ ਪੱਗ ਪਿਆਰੇ।
ਜ਼ਿੰਦਗੀ 'ਚ ਜਿਉਣ...
ਜ਼ਿੰਦਗੀ 'ਚ ਜਿਉਣ ਦੇ ਲਈ ਦੱਸੋ ਕੀ ਹੈ ਰਹਿ ਜਾਣਾ,ਕਾਮ, ਕਰੋਧ, ਲੋਭ, ਮੋਹ ਜੇ ਨਾ ਅਹੰਕਾਰ ਹੋਵੇ।
ਬਾਬੇ ਕਹਿੰਦੇ ਸਾਰੇ ਮੇਵੇ ਸਾਡੇ ਲਈ ਨੇ ਧੁਰੋ ਲਿਖੇ,ਚਿਹਰੇ ਉੱਤੇ ਨੂਰ ਸਾਡੇ ਨਾਲ ਬੈਠੀ ਨਾਰ ਹੋਵੇ।
ਸਾਨੂੰ ਕਹਿੰਦੇ ਦਸਵਾਂ ਦਸੌਂਧ ਸਾਨੂੰ ਕੱਢੀ ਚੱਲੋ, ਟੈਕਸ ਉਗਰਾਹੁੰਦੀ ਜਿਵੇਂ ਕੋਈ ਸਰਕਾਰ ਹੋਵੇ।
ਅੱਜ ਕੱਲ੍ਹ ਲੋਕ ਉਨ੍ਹਾਂ ਬਾਬਿਆਂ ਨੂੰ ਕਹਿਣ ਵੱਡੇ,ਜਿੰਨੀ ਵੱਡੀ ਅਤੇ ਮਹਿੰਗੀ ਉਨ੍ਹਾਂ ਥੱਲੇ ਕਾਰ ਹੋਵੇ।
ਪੰਜ ਅਹਿਮ ਜ਼ਜ਼ਬੇ...
ਪੰਜ ਅਹਿਮ ਜ਼ਜ਼ਬੇ ਨੇ ਜ਼ਿੰਦਗੀ ਦੇ ਜਿਉਣ ਦੇ ਲਈ,ਮਿੱਟੀ ਹੈ ਮਨੁੱਖ ਕਾਮ, ਮੋਹ, ਅਹੰਕਾਰ ਬਿਨਾ।
ਕਾਮ ਤੋਂ ਉਤਪਤੀ ਹੈ, ਮੋਹ ਨਾਲ ਰਿਸ਼ਤੇ ਨੇ,ਜ਼ਿੰਦਗੀ ਨਿਰਾਰਥਕ ਹੈ ਜ਼ਿੰਦਗੀ ਦੇ ਪਿਆਰ ਬਿਨ੍ਹਾਂ।
ਮਾਣ ਅਹੰਕਾਰ ਬਾਝੋਂ ਜਿਉਣ ਸਦਾ ਆਲਸੀ ਹੀ,ਹੁੰਦਾ ਨਹੀਂ ਵਿਕਾਸ ਕਦੇ ਲੋਭ ਦੇ ਵਿਚਾਰ ਬਿਨ੍ਹਾਂ।
ਮਾਇਆ ਤਾਈਂ ਨਾਗਣੀ ਜੋ ਆਖਦੇ ਮਹਾਂਪੁਰਸ਼,ਸਾਰਦੇ ਨਹੀਂ ਖੁਦ ਸੱਤ ਲੱਖ ਵਾਲੀ ਕਾਰ ਬਿਨਾਂ।
ਮਹਿਲਨੁਮਾਂ ਡੇਰਿਆਂ 'ਚ ਪਾਉਂਦੇ ਚੋਲੇ ਰੇਸ਼ਮੀ ਨੇ,ਵਿਹਲੜਾਂ ਦੀ ਐਸ਼ ਹੁੰਦੀ ਹੈ ਨਹੀਂ ਸਰਕਾਰ ਬਿਨ੍ਹਾਂ।
ਸਾਰੇ ਪੱਤੇ ਰੰਗ ਦੇ ਲੁਕੋ ਕੇ ਬਾਜ਼ੀ ਜਿੱਤ ਲੈਂਦੇ,ਸਾਨੂੰ ਕਹਿੰਦੇ ਹਿਲਦਾ ਨਹੀਂ ਪੱਤਾ ਕਰਤਾਰ ਬਿਨਾਂ।
ਚੁੰਨੀ ਰੇਸ਼ਮੀ 'ਚ
ਚੁੰਨੀ ਰੇਸ਼ਮੀ 'ਚ ਸੱਤ ਧਾਰੀਆਂ ਸੀ ਹਾਏ,ਸਾਨੂੰ ਪਹਿਨਣ ਨਾ ਦਿੰਦੀਆਂ ਕਬੀਲਦਾਰੀਆਂ ਨੀ ਮਾਏ।
ਲੂਣ, ਤੇਲ, ਲੱਕੜਾਂ ਦਾ ਸੰਸਾ ਰਹੇ ਹਰ ਵੇਲੇ,ਸਾਡੀਆਂ ਤਾਂ ਇਹੀਓ ਖੁਦਮੁਖਤਿਆਰੀਆਂ ਨੀ ਮਾਏ।
ਰਾਜਨੇਤਾ, ਅਫਸਰਾਂ, ਪੁਰੋਹਿਤਾਂ ਸਾਨੂੰ ਲੁੱਟਿਆ ਏ,ਰਹਿੰਦਾ ਸਾਡਾ ਖੂਨ ਚੂਸਿਆ ਵਪਾਰੀਆਂ ਨੀ ਮਾਏ।
ਪਿੰਡਾਂ ਵਿੱਚ ਭਾਵੇਂ ਸਾਡੇ ਗੱਡੇ, ਭੇਡੇ ਚੱਲਦੇ ਨੇ,ਬੱਸਾਂ ਵਾਲੇ ਸਾਨੂੰ ਆਖਦੇ ਸਵਾਰੀਆਂ ਨੀ ਮਾਏ।
ਨਕਸ਼ਾਂ ਦੀ ਨਹੀਂ...
ਨਕਸ਼ਾਂ ਦੀ ਨਹੀਂ ਇਤਫਾਕੀਆ ਸੁਡੌਲਤਾ ਇਹ,ਹੁਸਨ ਤਾਂ ਸੰਗ੍ਰਹਿ ਹੈ ਆਦਤਾਂ ਪਿਆਰੀਆਂ ਦਾ।
ਗੋਰੇ ਚਿਹਰੇ, ਸੋਹਣੇ ਲੀੜੇ ਪਾ ਕੇ ਵਰਗਲਾਉਣ ਏਦਾਂ,ਹੁੰਦਾ ਹੈ ਹੁਸਨ ਜਿਵੇਂ ਸੌਦਾ ਵਿਉਪਾਰੀਆਂ ਦਾ।
ਸੁਹਣੇ ਬਣ ਦਿਸਣਾ ਤੇ ਰਹਿਣਾ ਸਜ ਫਬ ਕੇ ਇਹ,ਮੁੱਢ ਤੋਂ ਹੀ ਸ਼ੌਕ ਇੱਥੇ ਸਾਰੇ ਨਰ ਨਾਰੀਆਂ ਦਾ।
ਸੱਚੇ ਸੁੱਚੇ ਇਸ਼ਕਾਂ ਦੇ ਲੰਘ ਗਏ ਨੇ ਦੌਰ ਯਾਰੋ,ਮੰਗਦੇ ਨੇ ਮੁੱਲ ਹੁਣ ਰਾਂਝੇ ਮੱਝਾਂ ਚਾਰੀਆਂ ਦਾ।
ਬਟੂਏ ਤੁਹਾਡੇ ਵਿੱਚ...
ਬਟੂਏ ਤੁਹਾਡੇ ਵਿੱਚ ਜੇ ਨਾ ਹੋਵੇ ਸੌ ਦਾ ਨੋਟ,ਐਵੇਂ ਨੋਟ ਹੋਣ ਦਾ ਵੀ ਕਰੀਏ ਬਹਾਨਾ ਨਾ।
ਮੱਲੋ ਮੱਲੀ ਆਪਣੇ ਵਿਚਾਰਾਂ ਤਾਈਂ ਪੇਸ਼ ਕਰ,ਆਪਣੀ ਹੀ ਸ਼ਕਲ ਬਣਾਈਏ ਮੂਰਖਾਨਾ ਨਾ।
ਆਪਣੀ ਸਿਆਣਪ ਦਾ ਕਰਕੇ ਵਿਖਾਵਾ ਬਹੁਤ,ਬਣ ਸਕੇ ਕੋਈ ਵੀ ਮੂਰਖ ਕਦੇ ਦਾਨਾ ਨਾ।
ਉਸ ਤਾਈਂ ਦੱਸੋ ਮਜ਼ਾ ਸ਼ਾਇਰੀ ਦਾ ਆਊ ਕਿੱਦਾਂ,ਜਿਸ ਦੀ ਤਬੀਅਤ ਹੀ ਹੋਵੇ ਸ਼ਾਇਰਾਨਾ ਨਾ।
ਸੱਚ ਦੇ ਰਾਹ ...
ਸੱਚ ਦੇ ਰਾਹ ਉੱਤੇ ਸਦਾ ਚੱਲਦੇ ਦਲੇਰ ਬੰਦੇ,ਜਿਨ੍ਹਾਂ ਨੂੰ ਸਮਰਪਿਤ ਨੇ ਕਵੀ ਗੀਤ ਕਰਦੇ।
ਝੂਠ ਕੋਈ ਗਲਤੀ ਜਾਂ ਦੁਰਘਟਨਾ ਨਹੀਂ ਹੁੰਦੀ,ਸੁਭਾਵਿਕ ਹੀ ਝੂਠੇ ਝੂਠ ਥੀਂ ਪ੍ਰੀਤ ਕਰਦੇ।
ਝੂਠ ਹੈ ਲੱਛਣ ਸਾਡੇ ਆਚਰਣ ਦਾ ਹੀ ਇੱਕ,ਇਹੋ ਜੇ ਲੱਛਣ ਜ਼ਿੰਦਗੀ ਪਲੀਤ ਕਰਦੇ।
ਸੱਚ ਦੀ ਸੁੰਦਰਤਾ ਹੈ ਜ਼ਿੰਦਗੀ ਨੂੰ ਗਰਮਾਉਂਦੀ,ਝੂਠ ਸਾਡੀ ਜ਼ਿੰਦਗੀ ਨੂੰ ਠੰਡਾ ਸੀਤ ਕਰਦੇ।
ਕਹਿੰਦਾ ਵਾਰਸ ਸ਼ਾਹ...
ਕਹਿੰਦਾ ਵਾਰਸ ਸ਼ਾਹ ਜਾਣ ਆਦਤਾਂ ਪੁਰਾਣੀਆਂ ਨਾ,ਰੱਖ ਦੇਣ ਲੋਕ ਭਾਵੇਂ ਕੱਟ ਕੱਟ ਪੋਰੀਆਂ।
ਹੱਥਾਂ ਵਿੱਚ ਫੜ੍ਹ ਕੇ ਸਿਮਰਣੇ ਮਸਤ ਹੋਏ,ਸ਼ਰੇਆਮ ਠੱਗ ਕਰੀ ਜਾਂਦੇ ਠੱਗੀ ਠੋਰੀਆਂ।
ਅੰਧ ਵਿਸ਼ਵਾਸ਼ ਅਸ਼ਲੀਲਤਾ ਫੈਲਾਈ ਜਾਂਦੇ,ਜਾਣੇ ਸਰਕਾਰ ਅਸਾਂ ਦੀਆਂ ਕਮਜ਼ੋਰੀਆਂ।
ਡਾਂਗ ਉੱਤੇ ਡੇਰਾ ਰੱਖ ਹੱਕ ਸੱਭ ਖੋਹ ਲੈਂਦੇ,ਹੱਕ ਸਾਡੇ ਮਾਰ ਗਈਆਂ ਰੱਬ ਉੱਤੇ ਡੋਰੀਆਂ।
ਸੂਝਵਾਨ ਬੰਦੇ ਮੂਲ..
ਸੂਝਵਾਨ ਬੰਦੇ ਮੂਲ ਭਾਉਂਦੇ ਨਾ ਹਕੂਮਤਾਂ ਨੂੰ,ਬਿੱਲੀਆਂ ਨੂੰ ਲੱਗਦੇ ਸਿਆਣੇ ਚੂਹੇ ਚੰਗੇ ਨਾ।
ਲਤੋਂ ਆਹਰੀ ਬੰਦੇ ਨੂੰ ਨਾ ਲੱਗਦੇ ਨਚਾਰ ਚੰਗੇ,ਢੀਠ ਬੰਦਾ ਮੰਗਣੋਂ ਕਦੇ ਵੀ ਮੂਲ ਸੰਗੇ ਨਾ।
ਨੇਤਾ ਅਤੇ ਸੱਚ ਦਾ ਹੈ ਇੱਟ ਕੁੱਤੇ ਵਾਲਾ ਵੈਰ,ਨੇਤਾ ਕਾਹਦਾ ਹੋਇਆ ਜਿਹੜਾ ਲਵੇ ਪੁੱਠੇ ਪੰਗੇ ਨਾ।
ਇੱਕ ਵਾਰੀ ਬਣ ਗਿਆ ਬੰਦਾ ਜਿਹੜਾ ਚੇਅਰਮੈਨ,ਮਾਇਆ ਦੀ ਨਦੀ 'ਚ ਫਿਰ ਕਿਵੇਂ ਹੱਥ ਰੰਗੇ ਨਾ।
ਕਿਹੜਾ ਉਹ ਨਜ਼ੂਮੀਆ...
ਕਿਹੜਾ ਉਹ ਨਜ਼ੂਮੀਆ ਜੋ ਦੱਸ ਦੇਵੇ ਸਾਡੇ ਤਾਈਂ,ਕਿਹੋ ਜਿਹੇ ਲਿਖੇ ਸਾਡੇ ਮੱਥੇ ਉੱਤੇ ਲੇਖ ਨੀ।
ਸਾਨੂੰ ਪਤੈ ਰਾਸ਼ੀ ਸਾਡੀ ਬਿਨਾ ਰਾਸ਼ੀ ਵਾਲਾ ਘਰ,ਕਾਗਜ਼ਾਂ 'ਚ ਹੋਵੇ ਭਾਵੇਂ ਮੀਨ, ਬ੍ਰਿਖ, ਮੇਖ ਨੀ।
ਭੁੱਖ, ਦੁੱਖ, ਨੰਗ, ਰਿਸ਼ਵਤ ਬੇਈਮਾਨੀ ਵਾਲੇ, ਰਾਹੂਕੇਤੂ ਰਹੇਸਾਨੂੰ ਹਰ ਵੇਲੇ ਦੇਖ ਨੀ।
ਕਰਦੇ ਬਲੈਕਮੇਲ ਸਾਡੇ ਜ਼ਜ਼ਬਾਤ ਦੀ ਨੇ,ਇਹ ਜੋ ਵਿਹਲੇ ਬੈਠੇ ਭਾਈ ਪੰਡਤ ਤੇ ਸ਼ੇਖ ਨੀ।
ਉੱਲੂਆਂ ਦਾ ਸ਼ੌਕ ...
ਉੱਲੂਆਂ ਦਾ ਸ਼ੌਕ ਹੈ ਹਨੇਰਿਆਂ ਦੇ ਵਿੱਚ ਰਹਿਣਾ,ਉੱਡਦੇ ਉਕਾਬ ਸਦਾ ਉੱਚੇ ਅਸਮਾਨ 'ਤੇ।
ਲਕੀਰ ਦੇ ਫਕੀਰ ਨਾਲ ਬਹਿਸ ਦਾ ਨਾ ਕੋਈ ਫਾਇਦਾ,ਆਪਣੀ ਜੋ ਸੋਚ ਲਾਉਣ ਜਾਣਦਾ ਨਾ ਸਾਨ 'ਤੇ।
ਧਰਤੀ ਨੂੰ ਘੁੰਮਦੀ ਜਾ ਕਿਹਾ ਸੀ ਗਲੈਲੀਓ ਨੇ, ਹੋਇਆ ਸੀ ਚਰਚ ਖਫਾ ਉਸ ਦੇ ਬਿਆਨ 'ਤੇ।
ਤਿੰਨ ਸਦੀਆਂ ਬਾਅਦ ਹੈ ਗਲੈਲੀਓ ਨੂੰ ਮਾਫ ਕੀਤਾ,ਬੜਾ ਸ਼ਰਮਿੰਦਾ ਹੈ ਚਰਚ ਹਾਰ ਜਾਣ 'ਤੇ।
ਸੰਤਾਂ ਦੀ ਨਿੰਦਾ...
ਸੰਤਾਂ ਦੀ ਨਿੰਦਾ, ਸੰਤ ਕਹਿੰਦੇ, ਬਹੁਤ ਬੁਰੀ ਹੁੰਦੀ,ਸੰਤ ਕਰਨ ਨਿੰਦਿਆ, ਤਾਂ ਸੰਤਾਂ ਨੂੰ ਮਾਫ ਹੈ ਜੀ।
ਗ੍ਰਹਿਸਥੀ ਤੋਂ ਧਨ ਲੈ ਕੇ ਗ੍ਰਹਿਸਥੀ ਨੂੰ ਕਹਿਣ ਮੰਦਾ,ਰਿੱਝਦਾ ਅੰਦਰ ਜੀਹਦੀ ਕੱਢਦੇ ਨਾ ਭਾਫ ਹੈ ਜੀ।
ਭਰੀ ਜਾਂਦੇ ਪੇਟ ਸੁਆਦੀ ਪਕਵਾਨਾਂ ਨਾਲ ਰੋਜ਼,ਹਟਦੇ ਨਾ ਖਾਣੋਂ ਭਾਵੇਂ ਲੱਗ ਜਾਂਦੀ ਡਾਫ ਹੈ ਜੀ।
ਰਾਜਾ ਤੇ ਪ੍ਰੋਹਿਤ ਦੋਵੇਂ ਪਰਜਾ ਨੂੰ ਲੁੱਟਦੇ ਨੇ,ਧਰਮ ਤੇ ਸਤ੍ਹਾ ਦੀ ਭਾਈਵਾਲੀ ਹਾਫ ਹਾਫ ਹੈ ਜੀ।
ਸਾਕ ਮਿਲਦਿਆਂ ਦੇ...
ਸਾਕ ਮਿਲਦਿਆਂ ਦੇ, ਭੌਂ ਵਾਹੁੰਦਿਆਂ ਦੀ, ਹੁੰਦੀ ਸਿਰਾਂ ਨੂੰ ਸਦਾ ਸਲਾਮ ਬੇਲੀ।
ਹੁੰਦੇ ਮੂੰਹਾਂ ਦੇ ਤਾਈਂ ਮੁਲਾਜ੍ਹੜੇ ਨੇ, ਚੰਗੇ ਕੰਮਾਂ ਨੂੰ ਮਿਲੇ ਇਨਾਮ ਬੇਲੀ।
ਪਾਠ ਸੁਬ੍ਹਾ ਦਾ ਅਜੇ ਨਾ ਯਾਦ ਹੋਇਆ, ਢਲਦੀ ਆਉਂਦੀ ਹੈ ਸਿਰਾਂ 'ਤੇ ਸ਼ਾਮ ਬੇਲੀ।
ਰਾਖੀ ਕਿਰਤ ਦੀ ਜੇ ਨਾ ਤੂੰ ਕੀਤੀ, ਇਉਂ ਹੀ ਖਾਣਗੇ ਬਦਾਮ ਬੇਲੀ।
ਹੋਈਆਂ ਬੋਦੀਆਂ ਕਿਸਮਤਾਂ..
ਹੋਈਆਂ ਬੋਦੀਆਂ ਕਿਸਮਤਾਂ ਵਾਲੀਆਂ ਇਹ, ਪਰ੍ਹੇ ਝਾੜ ਕੇ ਸਾਰੀਆਂ ਬੋਰੀਆਂ ਰੱਖ।
ਜੱਗ 'ਗੰਨੇ' ਸੁਆਦ ਜੇ ਮਾਨਣਾਂ ਹੈ, ਸਾਰੀਆਂ ਇਹ ਦੀਆਂ ਪੋਰੀਆਂ ਪੋਰੀਆਂ ਝੱਖ।
ਡੇਰਾ ਡਾਂਗ 'ਤੇ ਰੱਖਣਾ ਸਿੱਖ ਬੀਬਾ, ਦੂਰ ਮਨ ਦੀਆਂ ਸਭ ਕਮਜ਼ੋਰੀਆਂ ਰੱਖ।
ਆਪੇ ਆਵਣੇ ਮੇਮਣੇ ਨਹੀਂ ਚਰਕੇ, ਰੱਬ ਉੱਤੇ ਨਾ ਝੂਠੀਆਂ ਡੋਰੀਆਂ ਰੱਖ।
ਅੰਤਿਕਾ
ਬੀਬਾ ਤੂੰ ਸ਼ਰਾਬ ਜੇ ਛੱਡ ਦੇਵੇਂ, ਤੇਰੇ ਜਿਹਾ ਨਾ ਕੋਈ ਗਰੇਟ ਪਿਆਰੇ।
ਦਾਰੂ ਤੇਰੀ ਹੈ ਛਵੀਂ ਵਿਗਾੜ ਦਿੰਦੀ, ਲੋਕ ਕਰਨ ਲੱਗਦੇ ਤੈਨੂੰ ਹੇਟ ਪਿਆਰੇ।
ਸੋਫੀ ਛੇਤੀ ਹੀ ਕੰਮ ਨਿਬੇੜ ਲੈਂਦੇ, ਮੈਅਕਸ਼* ਹੁੰਦੇ ਹਮੇਸ਼ਾ ਨੇ ਲੇਟ ਪਿਆਰੇ।
ਅਸਲ ਵਿੱਚ ਤੂੰ ਖੁਦ ਖੁਦਾ ਢਿੱਲੋਂ ਆਪੇ ਲਿਖੀਆਂ ਆਪੇ ਹੀ ਮੇਟ ਪਿਆਰੇ।
*ਸ਼ਰਾਬੀ