ਕਿਸ ਕਿਸ ਨੂੰ ...

ਕਿਸ ਕਿਸ ਨੂੰ ਖੋਲ੍ਹ ਵਿਸਥਾਰ ਦੱਸੀਏ, ਅਸੀਂ ਕਿਉਂ ਨਹੀਂ ਆਪਣੇ ਘਰ ਜਾਂਦੇ।
ਜ਼ਿੰਦਗੀ ਦੀ ਨਿਰਾਰਥਕ ਦੌੜ ਦੇ ਵਿੱਚ, ਨਿੱਤ ਸੁਪਨੇ ਦਰਜਨਾਂ ਮਰ ਜਾਂਦੇ।
ਸਿਆਸਤ ਵਾਲੇ ਨੇ ਹਾਰ ਕੇ ਜਿੱਤ ਜਾਂਦੇ, ਅਸੀਂ ਜਿੱਤ ਕੇ ਰੋਜ਼ ਹਾਂ ਹਰ ਜਾਂਦੇ।
ਸਾਡੇ ਜਜ਼ਬੇ ਤੂਤ ਦੀ ਲਗਰ ਵਰਗੇ, ਵਿਹਲੜ ਸਾਧਾਂ ਦੇ ਬੋਤੇ ਨੇ ਚਰ ਜਾਂਦੇ।
ਅੱਜ ਕੱਲ੍ਹ ਨੇਤਾਵਾਂ...
ਅੱਜ ਕੱਲ੍ਹ ਨੇਤਾਵਾਂ ਨੂੰ ਮਿਲਣ ਵੇਲੇ, ਰੱਖਣਾ ਨੱਕ 'ਤੇ ਪੈਂਦਾ ਰੁਮਾਲ ਬਾਬਾ।
ਭ੍ਰਿਸ਼ਟਾਚਾਰ ਦੀ ਇਨ੍ਹਾਂ 'ਚੋਂ ਬੋਅ ਆਉਂਦੀ, ਕੁਨਬਾਪਰਵਰੀ ਰਹਿੰਦੀ ਹੈ ਨਾਲ ਬਾਬਾ
।ਨੇਤਾ ਚੱਲ ਕੇ ਆਉਣ ਜਦ ਕੋਲ ਤੇਰੇ, ਦੇਖ ਦੂਰੋਂ ਹੀ ਗੰਢ ਸੰਭਾਲ ਬਾਬਾ।
ਲੱਗ ਪਈ ਹੈ ਵੋਟਾਂ ਦੀ ਹੋਣ ਬੋਲੀ, ਵੋਟਰ ਬਣ ਗਏ ਮੰਡੀ ਦਾ ਮਾਲ ਬਾਬਾ।
ਜਿਸ ਵਿੱਚ ਵਿਗਿਆਨ...
ਜਿਸ ਵਿੱਚ ਵਿਗਿਆਨ ਦੀ ਵਗੇ ਗੰਗਾ, ਰੋਜ਼ ਪੁਟੀਏ ਨਵੀਂ ਇੱਕ ਆਡ ਪਿਆਰੇ।
ਜਿਸ ਨਾਲ ਨੇ ਜਾਂਵਦੇ ਵਿਗੜ ਬੱਚੇ, ਇਹੋ ਜਿਹਾ ਨਾ ਕਰੀਏ ਲਾਡ ਪਿਆਰੇ।
ਉਪ ਗ੍ਰਹਾਂ ਬ੍ਰਹਿਮੰਡ ਹੈ ਛਾਣ ਦਿੱਤਾ, ਲੱਭਾ ਕਿਤੇ ਖੁਦਾ ਨਾ ਗਾਡ ਪਿਆਰੇ।
ਸਿਰਫ ਸੱਚ ਹੈ ਦਿਸ ਰਹੀ ਇਹ ਦੁਨੀਆਂ, ਸਵਰਗ ਲੋਕ ਹੈ ਸਭ ਫਰਾੜ ਪਿਆਰੇ।
ਡੱਡੂ ਫੇਰ ਗੜੈਂ...
ਡੱਡੂ ਫੇਰ ਗੜੈਂ ਗੜੈਂ ਕਰਨ ਲੱਗੇ, ਨੇੜੇ ਚੋਣਾਂ ਦੀ ਆਈ ਬਰਸਾਤ ਬੇਲੀ।
ਰਾਜੇ ਰਾਣੀਆਂ ਹਰਮ 'ਚੋਂ ਬਾਹਰ ਆਏ, ਇੱਕ ਦੂਜੇ ਨੂੰ ਦੇਣ ਲਈ ਮਾਤ ਬੇਲੀ।
ਹੱਥ ਜੋੜਦੇ ਤੇ ਪੈਰ ਪਕੜਦੇ ਨੇ, ਦਿਨ ਦੇਖਦੇ ਨਹੀਂ ਤੇ ਨਾ ਰਾਤ ਬੇਲੀ।
ਪੰਜ ਸਾਲ ਫਿਰ ਵੋਟ ਗਰੀਬੜੀ ਦੀ, ਨਹੀਂ ਪੁੱਛਣੀ ਕਿਸੇ ਨੇ ਬਾਤ ਬੇਲੀ।
ਮੱਖਣ ਨਿਕਲਦੈ ਰਿੜਕਿਆਂ...
ਮੱਖਣ ਨਿਕਲਦੈ ਰਿੜਕਿਆਂ ਦਹੀਂ ਵਿੱਚੋਂ, ਐਵੇਂ ਪਾਣੀ ਖੰਗਾਲਦੇ ਨਹੀਂ ਹੁੰਦੇ।
ਹਰ ਇੱਕ ਦੀ ਆਪਣੀ ਸੋਚ ਹੁੰਦੀ, ਸਾਰੇ ਆਪਣੇ ਨਾਲ ਦੇ ਨਹੀਂ ਹੁੰਦੇ।
ਗਲਤੀ ਯਾਰਾਂ ਦੀ ਯਾਰ ਲੁਕੋ ਲੈਂਦੇ, ਐਵੇਂ ਗੱਲ ਉਛਾਲਦੇ ਨਹੀਂ ਹੁੰਦੇ।
ਚੰਗੀ ਸੋਚ ਵਾਲੇ ਆਪਣੇ ਮਨ ਅੰਦਰ, ਭਰਮ ਕਦੇ ਵੀ ਪਾਲਦੇ ਨਹੀਂ ਹੁੰਦੇ।
ਨਹੀਂ ਜ਼ਿੰਦਗੀ ਸਿੱਧਾ...
ਨਹੀਂ ਜ਼ਿੰਦਗੀ ਸਿੱਧਾ ਸਪਾਟ ਰਸਤਾ, ਭਰਿਆ ਹੋਇਆ ਇਹ ਵਿੰਗ ਵਲਾਂਵਿਆਂ ਦਾ।
ਜਿਹੜੇ ਲੋਕਾਂ ਦੇ ਦਿਲਾਂ 'ਚ ਵਾਸ ਕਰਦੇ, ਹੁੰਦੇ ਆਸਰਾ ਉਹੀਓ ਨਿਥਾਵਿਆਂ ਦਾ।
ਸੂਝਵਾਨਾਂ ਦੀ ਜਦੋਂ ਤਲਾਸ਼ ਕੀਤੀ, ਮੇਲਾ ਲੱਗਿਆ ਦੇਖਿਆ ਝਾਂਵਿਆਂ ਦਾ।
ਕਿਸੇ ਲਈ ਉਹ ਧੁੱਪਾਂ ਨਹੀਂ ਸਿਰਜ ਸਕਦੇ, ਪਿੱਛਾ ਕਰਦੇ ਜਿਹੜੇ ਪਰਛਾਵਿਆਂ ਦਾ।