ਜਿੱਥੇ ਫਿਰਨ ਆਵਾਰਾ ਕੁੱਤੀਆਂ ਜੀ, ਉਹ ਸਮਝੋ ਮਰੀ ਪੰਚਾਇਤ ਦੇ ਪਿੰਡ ਹੁੰਦੇ।
ਸਬਜ਼ਬਾਗ ਨਾ ਹੋਣ ਜਿਸ ਧਰਤ ਉੱਤੇ, ਉੱਥੇ ਬਣੇ ਪ੍ਰਧਾਨ ਅਰਿੰਡ ਹੁੰਦੇ।
ਡੰਗ ਮਾਰਨ ਦੀ ਹੀ ਜਿਹੜੇ ਸੋਚਦੇ ਨੇ, ਜੂਨ ਬੰਦੇ ਦੀ ਵਿੱਚ ਭਰਿੰਡ ਹੁੰਦੇ।
ਜਿੱਥੇ ਗੱਡੀ ਦੇ ਇੱਕੋ ਜਿਹੇ ਹੋ ਪਹੀਏ ਵਿਰਲੇ ਇਹੋ ਜਿਹੇ ਵਾਈਫ ਹੱਸਬੈਂਡ ਹੁੰਦੇ।
ਅਸਫਲਤਾ ਦਾ ਭਾਵਅਸਫਲਤਾ ਦਾ ਭਾਵ ਕਿ ਸਫਲਤਾ ਲਈ ਕੀਤੇ ਗਏ ਨਾ ਬੰਦੇ ਤੋਂ ਜਤਨ ਪੂਰੇ।
ਬੰਦਾ ਦੋਸ਼ ਸਿਤਾਰਿਆਂ ਸਿਰ ਲਾਉਂਦਾ, ਅਤੇ ਅਣਲਿਖੀਆਂ ਕਿਸਮਤਾਂ ਨੂੰ ਘੂਰੇ।
ਜਿਹੜੇ ਜੀਅ ਚੁਰਾਂਵਦੇ ਮਿਹਨਤਾਂ ਤੋਂ, ਉਹ ਆਦਮੀ ਹੁੰਦੇ ਨੇ ਖਾਣ ਸੂਰੇ।
ਅਸੀਂ ਗਿਆਨ ਦੇ ਅੱਖਰ ਹਾਂ ਲਈ ਫਿਰਦੇ, ਬੈਠੇ ਪਰ੍ਹੇ ਦੇ ਵਿੱਚ ਸਭ ਹੈਨ ਮੂਰੇ।
ਸ਼ੱਸ਼ਤਰ ਕਲਮ, ਜ਼ੁਬਾਨ...
ਸ਼ੱਸ਼ਤਰ ਕਲਮ ਜ਼ੁਬਾਨ ਦਾ ਜਿਸ ਕੋਲੇ, ਬੈਠਾ ਦੇਖਦਾ ਉੱਥੇ ਹੈ ਮੂਕ ਸ਼ਾਸ਼ਤਰ।
ਸ਼ਬਦ ਵਰਤਣੇ ਬੰਦੇ ਨੂੰ ਆਉਣ ਜੇਕਰ, ਹੁੰਦੈ ਸੱਭ ਤੋਂ ਇਹੋ ਅਚੂਕ ਸ਼ਾਸ਼ਤਰ।
ਵਿਦਵਾਨ ਨੇ ਇਹ ਨੂੰ ਜਗਾ ਲੈਂਦੇ, ਹੁੰਦਾ ਮੂਰਖਾਂ ਲਈ ਸੁੱਤਾ ਘੂਕ ਸ਼ਾਸ਼ਤਰ।
ਚਮਚਦੇਵ ਤਾਹੀਓਂ ਕਾਮਯਾਬ ਅੱਜ ਕੱਲ੍ਹ, ਹੁੰਦਾ ਉਨ੍ਹਾਂ ਦੇ ਕੋਲ ਫੂਕ ਸ਼ਾਸ਼ਤਰ।
ਸਦਾ ਘੁੱਗੀਆਂ ਤਾਂ...
ਸਦਾ ਘੁੱਗੀਆਂ ਤਾਂ ਅਮਨ ਚਾਹੁੰਦੀਆਂ ਨੇ, ਭਾਉਂਦੀ ਬੁਲਬੁਲਾਂ ਤਾਈਂ ਉਜਾੜ ਹੈ ਨਾ।
ਡਾਰ ਖੰਭਾਂ ਦੀ ਕਦੇ ਨਹੀਂ ਬਣ ਸਕਦੀ, ਬਣਦੇ ਰਾਈ ਦੇ ਕਦੇ ਪਹਾੜ ਹੈ ਨਾ।
ਸਦਾ ਭੁੱਖ, ਗਰੀਬੀ ਹੈ ਨਾਲ ਸਾਡੇ, ਸਾਡੇ ਘਰਾਂ ਨੂੰ ਲੱਗੇ ਕਿਵਾੜ ਹੈ ਨਾ।
ਸਾਨੂੰ ਜੇਲ੍ਹਾਂ ਦੇ ਵਿੱਚ ਹੀ ਤੁੰਨ ਦੇਵੋ, ਬਾਹਰ ਰੋਟੀ ਦਾ ਕੋਈ ਜੁਗਾੜ ਹੈ ਨਾ।
ਆਵਾਜ ਟੇਪ ਰਿਕਾਰਡ...
ਆਵਾਜ਼ ਟੇਪ ਰਿਕਾਰਡ ਦੀ ਫੁੱਲ ਕਰਕੇ, ਟਾਪ ਗੇਅਰ ਦੇ ਵਿੱਚ ਭਜਾਈ ਜਾਂਦਾ।
ਪੰਜ ਕਿੱਲਿਆਂ ਵਾਲਾ ਕਿਸਾਨ ਦੇਖੋ, ਟਰੈਕਟਰ ਤਾਈਂ ਹੈ ਕਾਰ ਬਣਾਈ ਜਾਂਦਾ।
ਰੀਸੋ ਰੀਸ ਮਸ਼ੀਨਰੀ ਨਵੀਂ ਲੈ ਕੇ, ਕਰਜ਼ਾ ਹੋਰ ਹੈ ਸਿਰ ਚੜ੍ਹਾਈ ਜਾਂਦਾ।
ਵਿਆਹ, ਮਰਨੇ ਅਤੇ ਦਿਖਾਵਿਆਂ ਦਾ, ਫੋਕਾ ਟੌਹਰ ਹੀ ਜੱਟ ਨੂੰ ਖਾਈਂ ਜਾਂਦਾ।
ਬੜਾ ਮਜ਼ਾ ਆਉਂਦੈ...
ਬੜਾ ਮਜ਼ਾ ਆਉਂਦੈ ਜੇਕਰ ਹੋਣ ਦੁਸ਼ਮਣ, ਦੁਸ਼ਮਣ ਹੋਣ ਤਾਂ ਬੰਦਾ ਹੁਸ਼ਿਆਰ ਰਹਿੰਦੈ।
ਝੂਠੀ ਦੋਸਤੀ ਸਾਡੇ ਚੁਫੇਰ ਪੱਸਰੀ, ਬੰਦਾ ਐਵੇਂ ਹੀ ਤਕਦਾ ਬਾਰ ਰਹਿੰਦੈ।
ਮੂਰਖ ਦੋਸਤ ਨਾਲੋਂ ਕਈ ਗੁਣਾ ਚੰਗਾ, ਦੁਸ਼ਮਣ ਕੋਈ ਬਣਿਆ ਸਮਝਦਾਰ ਰਹਿੰਦੈ।
ਦੁਸ਼ਮਣ ਹੋਣ ਤਾਂ ਫੇਰ ਹੀ ਦੋਸਤਾਂ ਸੰਗ, ਸੱਚੀਂਮੁੱਚੀਂ ਦਾ ਬਣਿਆ ਪਿਆਰ ਰਹਿੰਦੈ।
ਹੀਰ ਆਖਦੀ ਰਾਂਝਿਆ...
ਹੀਰ ਆਖਦੀ ਰਾਂਝਿਆ ਸਬਰ ਕਰ ਵੇ, ਸਬਰ ਵਾਲੇ ਨੂੰ ਕਦੇ ਨਾ ਥੋੜ੍ਹ ਰਹਿੰਦੀ।
ਬਹੁਤੀ ਪੀਣ ਵਾਲੇ ਰਹਿਣ ਝੂਰਦੇ ਵੇ, ਲੱਗੀ ਉਨ੍ਹਾਂ ਦੇ ਤਨਾਂ ਨੂੰ ਤੋੜ ਰਹਿੰਦੀ।
ਖਾਹਿਸ਼ਾਂ ਬੰਦੇ ਦੀਆਂ ਵਧੀ ਜਾਂਦੀਆਂ ਨੇ ਸਾਰੀ ਉਮਰ ਹੀ ਲੱਗੀ ਇਹ ਹੋੜ੍ਹ ਰਹਿੰਦੀ।
ਦੋ ਗਜ਼ ਕਫਨ ਤੋਂ ਬਾਦ ਵੀ ਹੋਰ ਦੇਖੋ, ਦੋ ਗਜ਼ ਜ਼ਮੀਨ ਦੀ ਵੀ ਹੈ ਲੋੜ ਰਹਿੰਦੀ।
ਚਾਨਣ ਹੋਣ 'ਤੇ...
ਚਾਨਣ ਹੋਣ 'ਤੇ ਹੀ ਦਿਸਣ ਨਹੀਂ ਲੱਗਦਾ, ਅੱਖਾਂ ਵਿੱਚ ਵੀ ਚਾਹੀਦੀ ਜੋਤ ਹੋਣੀ।
ਚਾਹੀਦੀ ਹਰ ਵਕਤ ਜਿਗਿਆਸਾ ਦੇ ਨਾਲ, ਰੂਹ ਆਦਮੀ ਦੀ Àਤਪੋਤ ਹੋਣੀ।
ਜਿਗਿਆਸਾ ਲਈ ਵੀ ਹੁੰਗਾਰਿਆਂ ਦੀ ਚਾਹੀਦੀ ਇੱਕ ਹੱਸਮੁੱਖ ਲੜੀ ਸਰੋਤ ਹੋਣੀ।
ਝਰਨੇ ਵਾਂਗ ਵਹਿੰਦੇ ਫਿਰ ਗਿਆਨ ਅੰਦਰ, ਹੁੰਦੀ ਕਦੇ ਵੀ ਨਾ ਖੜੋਤ ਹੋਣੀ।
ਪਹਿਲੀ ਵਾਰ ਹੀ...
ਪਹਿਲੀ ਵਾਰ ਹੀ ਬਣ ਕੇ ਐਮ.ਐਲ.ਏ.,ਜਿਹੜਾ ਬਣ ਗਿਆ ਵੱਡਾ ਵਜ਼ੀਰ ਹੋਵੇ।
ਓਸ ਬੰਦੇ ਦਾ ਫਿਰ ਦਿਮਾਗ ਜਾਂਦਾ, ਰਾਤੋ ਰਾਤ ਹੀ ਜਿਹੜਾ ਅਮੀਰ ਹੋਵੇ।
ਭਾਈ ਲਾਲੋਆਂ 'ਚੋਂ ਉਹ ਨੂੰ ਮੁਸ਼ਕ ਆਉਂਦਾ, ਜੀਹਦਾ ਭਾਗੋਆਂ ਦੇ ਨਾਲ ਸੀਰ ਹੋਵੇ।
ਇਹੋ ਜਿਹਾ ਨਾ ਕੋਈ ਜਹਾਨ ਅੰਦਰ, ਜੀਹਦਾ ਸ਼ੁਰੂ ਦੇ ਵਾਂਗ ਅਖੀਰ ਹੋਵੇ।
ਤੈਨੂੰ ਲੈ ਗਏ...
ਤੈਨੂੰੰ ਲੈ ਗਏ ਜਿੰਨ੍ਹਾਂ ਨੇ ਦਮ ਤਾਰੇ, ਟਿਕਟੇ ਪੰਥ ਦੀਏ ਕਰਮਾ ਮਾਰੀਏ ਨੀ।
ਐਨ ਮੌਕੇ 'ਤੇ ਆਣ ਕੇ ਸਿੰਘ ਸਜ ਗਏ, ਭਰੂਣ ਹੱਤਿਆ ਦੇ ਵਿਉਪਾਰੀਏ ਨੀ।
ਪੋਸਤ, ਭੁੱਕੀ, ਸ਼ਰਾਬ ਤੇ ਨਸ਼ੇ ਵੰਡ ਕੇ, ਆਖਰ ਜਿੱਤ ਗਏ ਧਰਮਚਾਰੀਏ ਨੀ।
ਸਾਡੇ ਗੁਰਾਂ ਨੇ ਪੰਥ ਤੋਂ ਸਿਰ ਵਾਰੇ, ਅਸੀਂ ਸਿਰਾਂ ਤੋਂ ਪੰਥ ਨੂੰ ਵਾਰੀਏ ਨੀ।
ਹੁਸੀਨ ਆਦਤਾਂ ਦਾ...
ਹੁਸੀਨ ਆਦਤਾਂ ਦਾ ਸੰਗ੍ਰਹਿ ਹੁੰਦਾ, ਹੁਸ਼ਨ ਜਿਵੇਂ ਗੁਲਾਬ ਦਾ ਫੁੱਲ ਬੀਬਾ।
ਖੂਬਸੂਰਤ ਗਦਰਾਏ ਜਿਸਮ ਤੇ ਤਾਂ, ਜਣਾ ਖਣਾ ਹੀ ਜਾਂਦਾ ਹੈ ਡੁੱਲ੍ਹ ਬੀਬਾ।
ਮਹਿਕ ਕਦੇ ਵੀ ਨਹੀਂ ਬਾਜ਼ਾਰ ਵਿਕਦੀ ਹੁੰਦਾ ਹੁਸਨ ਦਾ ਕੋਈ ਨਾ ਮੁੱਲ ਬੀਬਾ।
ਮਿਹਨਤੀ ਖੁਰਦਰੇ ਹੱਥਾਂ ਦੇ ਨਹੀਂ ਵਿਹਲੜ ਕੋਮਲ ਹੱਥ ਹੁੰਦੇ ਤੁਲ ਬੀਬਾ।
ਕੋਰਾ ਕੋਰਾ ਕੁੱਜਾ...
ਕੋਰਾ ਕੋਰਾ ਕੁੱਜਾ ਠੰਡਾ ਠਾਰ ਪਾਣੀ, ਸਾਡੇ ਗਲੇ ਅਟਕਦਾ ਜਾਂਵਦਾ ਈ।
ਸਰਸਾ ਨਦੀ ਵਗੇ ਭ੍ਰਿਸ਼ਟਾਚਾਰ ਵਾਲੀ ਸਾਨੂੰ ਤਰਨਾ ਮੂਲ ਨਾ ਆਂਵਦਾ ਈ।
ਹਰ ਰੋਜ ਮਹਿੰਗਾਈ ਦੀ ਚਰਖੜੀ 'ਤੇ ਬੰਦ ਬੰਦ ਸਾਡਾ ਕੱਟਿਆ ਜਾਂਵਦਾ ਈ।
ਹਾਕਮ ਵਕਤ ਦਾ ਸਾਡਿਆਂ ਜ਼ਜ਼ਬਿਆਂ ਨੂੰ ਰੋਜ ਨੀਹਾਂ ਦੇ ਵਿੱਚ ਚਿਣਾਂਵਦਾ ਈ।
No comments:
Post a Comment