ਕਵੀ –ਓ –ਵਾਚ , ਰੜੀ ਭੰਬੀਰੀ ਬੋਲੇ 5-4-12

ਕਵੀ –ਓ –ਵਾਚ , ਰੜੀ ਭੰਬੀਰੀ ਬੋਲੇ 5-4-12
---ਵੋਟਾਂ ਮੰਗਣ ਅਉਂਦੇ ਨੇਤਾ ਜਿਪਸੀਆਂ 'ਤੇ ਸਾਡੀ ਰੜੇ ਭੰਬੀਰੀ ਬੋਲਦੀ ਹੈ।
ਛਿਣ ਭੰਗਰੀ ਖੁਸ਼ੀ ਵੀ ਜੇ ਆਵੇ ਉਹ ਵੀ ਲੰਘ ਜਾਂਦੀ ਸਾਡੇ ਕੋਲ ਦੀ ਹੈ।
ਸਿਆਸਤ ਲੋਭ ਦੀ ਅੱਜ ਗੁਲਾਮ ਹੋਕੇ ਸਾਡੀ ਜ਼ਿੰਦਗੀ ਤਾਈਂ ਤਾਈਂ ਮਧੋਲਦੀ ਹੈ।
ਸਾਡੇ ਸਾਹਾਂ ਦੀ ਪੂੰਜੀ ਕਸ਼ੀਦ ਕਰਕੇ ਪਤਾ ਨਹੀਂ ਕੀ ਮੋਇਆਂ 'ਚੋਂ ਟੋਲਦੀ ਹੈ।
--
ਨਹੁੰ ਮਾਸ ਦਾ ਕਹਿੰਦੇ ਸੀ ਇਕ ਰਿਸ਼ਤਾ ਜਿਹੜੇ ਉਹ ਵੀ ਲੈ ਜੰਮੂਰ ਖੜ• ਗਏ।
ਜਿਹੜੇ ਭਰਾ ਭਰਾ ਪਰਚਾਰਦੇ ਸਨ ਉਹ ਉਹਲੇ ਕੰਧਾਂ ਤੋਂ ਹੋ ਕੇ ਦੂਰ ਖੜ• ਗਏ।
ਦੇਖ ਹਰਕਤਾਂ ਬੰਦੇ ਦੀਆਂ, ਜੰਗਲਾਂ ਦੇ ਵਿਚ ਪ੍ਰੇਸ਼ਾਨ ਹੋ ਸਭ ਲੰਗੂਰ ਖੜ• ਗਏ।
ਜਿਹੜੇ ਕਹਿੰਦੇ ਸੀ ਅਸੀਂ ਜਮੀਨ ਵਾਲੇ ਲੇਬਰ ਚੌਂਕ 'ਚ ਬਣ ਮਜ਼ਦੂਰ ਖੜ• ਗਏ।
-
ਟੁੱਟੀ ਭੱਜੀ ਦਾ ਮੇਲਾ ਹੈ ਪੱਤਣਾ ਉਤੇ ਇਥੇ ਕੌਣ ਪੁਛਦਾ ਹੈ ਬੇਸਹਾਰਿਆਂ ਨੂੰੇ ।
ਅਸੀਂ ਪਿਸੇ ਹਾਂ ਚੱਕੀ ਮਹਿੰਗਾਈ ਦੀ ਵਿਚ ਸਾਨੂੰ ਚੈਨ ਨਾ ਟੁਟਿਆਂ ਤਾਰਿਆਂ ਨੂੰ।
ਕੁਲੀ ਕਖਾਂ ਦੀ ਸਾਡੀ ਸਦਾ ਉਦਾਸ ਹੋਕੇ ਤਕੇ ਲਿਸ਼ਕਦੇ ਮਹਿਲ ਮੁਨਾਰਿਆਂ ਨੂੰ।
ਬਣਿਆ ਰਹਿਣ ਦੇ ਲਈ ਮਕਾਨ ਕੋਈ ਨਾ ਛੱਜੂ ਤਰਸਦਾ ਰਿਹਾ ਚੁਬਾਰਿਆਂ ਨੂੰ।
---
ਭੁੱਖ ਨੰਗ ਦੇ ਹੁੰਦੇ ਨੇ ਇਹ ਨਾਮ ਤਿੰਨੇ ਲੁੱਚਾ ਭੜੂਆ ਅਤੇ ਬੇਈਮਾਨ ਬੇਲੀ।
ਪੈਸੇ ਵਾਲਿਆਂ ਵਿਚ ਐਬ ਹੋਣ ਕਿੰਨੇ ਉਹ ਵੀ ਬਣਦੇ ਉਹਨਾਂ ਦੀ ਸ਼ਾਨ ਬੇਲੀ।
ਨੇਤਾ ,ਸਾਧ,ਵਪਾਰੀ ਨਾ ਜੇਕਰ ਝੂਠ ਬੋਲਣ ਬੰਦਾ ਹੁੰਦਾ ਹੈ ਬੜਾ ਹੈਰਾਨ ਬੇਲੀ।
ਸਾਡੀ ਮੱਤ ਨੇ ਨੇਤਾ ਖਰੀਦ ਲੈਂਦੇ ਉਂਜ ਕਰਦੇ ਹਾਂ ਅਸਂੀਂ ਤਾਂ ਮੱਤਦਾਨ ਬੇਲੀ।
---
ਦਾਰੂ ਪੀਣ ਦਾ ਨਿਕਲਦਾ ਹੈ ਬੁਰਾ ਸਿੱਟਾ ਅਸੀਂ ਦੇਖੀ ਹੈ ਬੇਹਿਸਾਬ ਪੀ ਕੇ।
ਯਾਰਾਂ ਦੋਸਤਾਂ ਨਾਲ ਹਾਂ ਰਹੇ ਲੜਦੇ ਤੇ ਡਿੱਗੇ ਰਾਹਾਂ ਦੇ ਵਿਚ ਜਨਾਬ ਪੀਕੇ।
ਲੱਗ ਉਲਟੀਆਂ, ਡਾਊਨ ਬਲੱਡ ਹੋਇਆ ਬਣਿਆ ਪੇਟ 'ਚ ਹੈ ਤਜ਼ਾਬ ਪੀ ਕੇ।
ਹੱਥ ਕੰਬਦੇ ਨੇ ਤੁਰਿਆ ਨਹੀਂ ਜਾਂਦਾ ਲੱਤਾਂ ਵੀ ਜਾਂਦੀਆਂ ਦੇ ਜਵਾਬ ਪੀ ਕੇ।
ਨਾਲੇ ਲੋਕਾਂ 'ਚ ਹੋ ਗਿਆ ਅਕਸ ਮਾੜਾ ਢਿੱਲੋਂ ਕੀਤੀ ਹੈ ਸਿਹਤ ਖਰਾਬ ਪੀ ਕੇ।