ਗ਼ਜ਼ਲ (ਸਾਡੇ ਵਿਹੜੇ)

ਗ਼ਜ਼ਲ

ਸਾਡੇ ਵਿਹੜੇ ਰੋਜ਼ ਹੀ ਰਹਿੰਦੀ ਗ਼ਮ ਦੀ ਬਾਰਿਸ਼ ਆਈ ਅਕਸਰ,
ਮੇਰੇ ਮਨ ਦੀ ਧਰਤੀ ਰਹਿੰਦੀ ਹੈ, ਤ੍ਰਿਹਾਈ ਤ੍ਰਿਹਾਈ ਅਕਸਰ।
ਜਿਸ ਨੇ ਜ਼ਿੰਦਗੀ ਵਿੱਚ ਇੱਕ ਵਾਰੀ ਵੀ ਮਾਲੀ ਬਣ ਕੇ ਨਹੀਂ ਤੱਕਿਆ,
ਉਸ ਦੀ ਸੂਰਤ ਮੈਂ ਦੇਖੀ ਹੈ ਜੀ, ਮੁਰਝਾਈ ਮੁਰਝਾਈ ਅਕਸਰ।
ਚਾਰ ਕੁ ਬੰਦੇ ਮੋਢਾ ਦੇਣ ਲਈ ਪਿੱਛੋਂ ਰਹਿਣ ਜਾਂ ਨਾ ਰਹਿਣ ਭਾਵੇਂ,
ਅਸੀਂ ਤਾਂ ਸੱਚੀ ਗੱਲ ਕਹੀ ਹੈ, ਜੋ ਸਾਡੇ ਮਨ ਆਈ ਅਕਸਰ।
ਪਿਆਰ ਮੁਹੱਬਤ ਦੇ ਸਿਲਸਿਲੇ, ਜਿਸਮਾਂ ਤੱਕ ਸੀਮਤ ਹੋ ਗਏ ਨੇ,
ਅੱਜ ਦੇ ਇਸ਼ਕ 'ਚ ਕਾਮ ਵਾਸ਼ਨਾ ਹੀ ਲੈਂਦੀ ਅੰਗੜਾਈ ਅਕਸਰ।
ਜੇ ਖੁਸ਼ ਰਹਿਣੈ ਤਾਂ ਆਪਣਾ ਦੁੱਖ ਕਿਸੇ ਦੇ ਅੱਗੇ ਵੀ ਨਾ ਖੋਲ•ੀਂ,
ਸੁਣੀ ਗਈ ਤਾਂ ਤੈਥੋਂ ਸੁਣ ਲਈਂ, ਕੁਝ ਚਿਰ ਪੀੜ ਪਰਾਈ ਅਕਸਰ।
ਅੱਜ ਕੱਲ• ਚਾਰ ਚੁਫੇਰੇ ਵਗਦੀ ਹਵਾ ਸੁਆਰਥ ਤੇ ਮਤਲਬ ਦੀ,
ਇੱਕ ਵਾਰੀ ਨਹੀਂ ਲੱਖਾਂ ਵਾਰੀ, ਦੁਨੀਆਂ ਮੈਂ ਅਜ਼ਮਾਈ ਅਕਸਰ।
Ðਰੁੱਖਾਂ, ਫੁੱਲ, ਪਰਿੰਦਿਆਂ ਨਾਲੋਂ, ਵਧੀਆ ਦੋਸਤ ਕੋਈ ਨਹੀਂ ਹੁੰਦਾ,
ਆਦਮਜਾਤ ਤਾਂ ਮੁਢੋਂ ਰਹਿੰਦੀ ਆਈ ਹੈ ਹਰਜਾਈ ਅਕਸਰ।
ਅਮਰਜੀਤ ਢਿੱਲੋਂ ਨੂੰ ਮਿਲਣੈ? ਉਹ ਇਸ ਬਸਤੀ ਵਿੱਚ ਨਹੀਂ ਰਹਿੰਦਾ,
ਫੁੱਲਾਂ ਅਤੇ ਤਿਤਲੀਆਂ ਕੋਲੇ, ਰਹਿੰਦੈ ਉਹ ਸ਼ੈਦਾਈ ਅਕਸਰ।
ਅਮਰਜੀਤ ਢਿੱਲੋਂ (94171-20427)