gazal1983

੍ਵਨਜ਼ਰਾਂ ਕਿਤਾਬ 'ਚੋਂ ਜਰਾ ਚੁਕ ਕੇ ਉਤਾਹਾਂ ਦੇਖ, ਕਿਸ ਤਰਾਂ ਨੇ ਤਕਦੀਆਂ ਤੈਨੂੰ ਨਿਗਾਹਾਂ ਦੇਖ।
ਦਿਲ ਮੇਰਾ, ਹਉਕੇ ਮੇਰੇ ਇਹ ਹੰਝੂ ਭਰੇ ਹੋਏ ਨੈਣ ਤੇਰੀਆਂ ਯਾਦਾਂ ਦੀਆਂ ਨੇ ਖ਼ਾਨਗਾਹਾਂ ਦੇਖ।
ਅਗੇ ਹੀ ਅਗੇ ਦੇਖ ਨਾ ਰਸਤਾ ਤੂੰ ਕੂੰਜ ਵਾਂਗ ਤੇਰੇ ਵੀ ਪਿਛੇ ਆ ਰਿਹੈ ਕੋਈ ਪਿਛਾਹਾਂ ਦੇਖ।
ਕੋਈ ਸਫਾ ਖਾਲੀ ਨਹੀਂ ਦਿਲ ਦੀ ਕਿਤਾਬ ਦਾ ਕਿਸਤਰਾਂ ਮੱਲੀ ਮੇਰੀ ਜ਼ਿਦਗੀ ਗੁਨਾਹਾਂ ਦੇਖ।
ਦਰਦ ਦਾ ਤੂਫਾਨ ਫਿਰ ਉਠੇਗਾ ਸੀਨੇ ਵਿਚ ਨਕਸ਼ੇ 'ਤੇ ਹੁਣ ਨਾ ਬੀਤੀਆਂ ਹੋਈਆਂ ਉਹ ਰਾਹਾਂ ਦੇਖ।


ਹੋਠਾਂ 'ਚੋਂ ਇਕ ਵਾਰ ਵੀ ਸੀ ਤਕ ਨਾ ਕਰ ਸਕੇ ਕਿਸ਼ਤੀ ਡੁਬੋਈ ਆਪਣੀ ਕਿੱਦਾਂ ਮਲਾਹਾਂ ਦੇਖ।
ਮੁਟਿਆਰ ਕੁੜੀਆਂ ਵਾਂਗ ਸਨ ਖੇਤਾਂ 'ਚ ਹਸਦੀਆਂ ਮੰਡੀ 'ਚ ਆਕੇ ਕਾਲੀਆਂ ਹੋਈਆਂ ਕਪਾਹਾਂ ਦੇਖ।
ਵਾਰਿਸ ਜੇ ਹੁੰਦਾ ਅੱਜ ਤਾਂ ਹੁੰਦਾ ਹੈਰਾਨ ਬਹੁਤ ਭਾਈਆਂ ਦੇ ਹੁੰਦਿਆਂ ਭਜਦੀਆਂ ਭਾਈਆਂ ਤੋਂ ਬਾਹਾਂ ਦੇਖ।
ਸੰਗੀਨ ਜੀਭ ਬਣ ਗਈ ਅੱਜ ਦੇ ਮਨੁੱਖ ਦੀ ਅੱਖਾਂ 'ਚ ਸਭ ਦੇ ਉਗੀਆਂ ਨੇ ਕਤਲਗਾਹਾਂ ਦੇਖ।
ਜੇ ਦੇਖਣੈ ਤਾਂ ਦੇਖ ਲੈ ਸਾਡੇ ਹੀ ਦਿਲ ਦਾ ਦਰਦ ਐਵੇਂ ਨਾ ਸਾਗਰ ਉਮਡਦਾ ਹੇਠਾਂ ਉਤਾਹਾਂ ਦੇਖ।

Converted from Satluj to Unicode