***ਥਾਂ ਥਾਂ ਫਿਰਦੇ ਵੱਗ ਸਾਧਾਂ ਦੇ---

***ਥਾਂ ਥਾਂ ਫਿਰਦੇ ਵੱਗ ਸਾਧਾਂ ਦੇ---
ਆਹ ਬਾਬਾ ਜੀ ਦਾਦੂ ਵਾਲੇ , ਗੰਨਮੈਨ ਨੇ ਰਖਦੇ ਬਾਹਲੇ।ਇਹ ਨੇ ਚੰਦ ਪੁਰਾਣੇ ਵਾਲੇ , ਲੱਡੂ ਅਤੇ
ਮਖਾਣੇ ਵਾਲੇ।ਇਹ ਨੇ ਸੰਤ ਕਲੇਰਾਂ ਵਾਲੇ, ਉਧਰ ਸੰਤ ਝਨੇਰਾਂ ਵਾਲੇ।ਆਹ ਬਾਬਾ ਜੀ ਬੋਰੇ ਵਾਲੇ,
ਲੁਕ ਕੇ ਰਹਿੰਦੇ ਭੋਰੇ ਵਾਲੇ।ਇਹ ਬਾਬਾ ਜੀ ਮੌੜਾਂ ਵਾਲੇ , ਉਹ ਸੰਤ ਨੇ ਜੌੜਾਂ ਵਾਲੇ,ਔਹ ਨੇ ਸੰਤ
ਜਵੱਦੀ ਵਾਲੇ ਔਹ ਨੇ ਸੰਤ ਘਵੱਦੀ ਵਾਲੇ।
ਔਹ ਨਾਨਕਸਰੀਏ ਵਜਦੇ ਨੇ,ਉਹ ਅਬਰਸਰੀਏ ਲਗਦੇ ਨੇ,ਇਕ ਸੰਤ ਨੇ ਜੌਹਲਾਂ ਵਾਲੇ, ਦੂਜੇ ਸੰਤ
ਨੇ ਧੌਲਾਂ ਵਾਲੇ।ਉਹ ਆ ਗਏ ਮੋਗੇ ਵਾਲੇ, ਨੇੜੇ ਹੀ ਨੇ ਜੋਗੇ ਵਾਲੇ। ਇਹ ਬਾਬੇ ਨੇ ਝੋਹੜਾਂ ਵਾਲੇ ,
ਉਧਰ ਬੈਠੇ ਬੋਹੜਾਂ ਵਾਲੇ।ਇਛਿਆਧਾਰੀ, ਦੂਧਾਧਾਰੀ ,ਤੀਰਾਂ ਵਾਲੇ,ਪੀਰਾਂ ਵਾਲੇ, ਆਹ ਬਾਬ ਬਨਖੰਡੀ
ਏ ਜੀ, ਉਹ ਬਾਬਾ ਚੌਖੰਡੀ ਏ ਜੀ।ਮੱਖਣੀ ਵਾਲੇ , ਯੱਖਣੀ ਵਾਲੇ, ਸਿਆੜਾਂ ਤੇ ਮਨਵਾੜਾਂ ਵਾਲੇ।ਚਾਹ
ਵਾਲੇ ਤੇ ਛਾਹ ਵਾਲੇ ਨੇ , ਆਹ ਬਾਬਾ ਜੀ ਕੰਬਲੀ ਵਾਲੇ , ਔਹ ਬਾਬਾ ਜੀ ਸੰਗਲੀ ਵਾਲੇ।ਆਹ ਸੰਤ
ਨੇ ਊਨੇ ਵਾਲੇ , ਔਹ ਬਾਬਾ ਜੀ ਚੂਨੇ ਵਾਲੇ। ਜੰਡਾਂ ਵਾਲੇ, ਫੰਡਾਂ ਵਾਲੇ ,ਪਰੀਆਂ ਵਾਲੇ ਜਰੀਆਂ ਵਾਲੇ
,ਆ ਗਏ ਸੰਤ ਖੜਾਵਾਂ ਵਾਲੇ, Àਹ ਨੇ ਸੰਤ ਸਰਾਵਾਂ ਵਾਲੇ, ਆ ਗਏ ਆਹ ਮਨਾਵਾਂ ਵਾਲੇ।ਧੂਣੀਆਂ
ਵਾਲੇ , ਖੂਹਣੀਆਂ ਵਾਲੇ,ਜੰਤਰਾਂ ਵਾਲੇ, ਮੰਤਰਾਂ ਵਾਲੇ, ਲਾਲਾਂ ਵਾਲੇ, ਜਾਲਾਂ ਵਾਲੇ,ਆਹ ਨੇ ਸੰਤ
ਧਿਆਨੂੰਪੁਰੀਏ, ਉਧਰ ਆ ਗਏ ਮਾਨੂੰਪੁਰੀਏ।ਮੋਤੀਆਂ ਵਾਲੇ, ਜੋਤੀਆਂ ਵਾਲੇ, ਘਾਗੋ ਅਤੇ ਸ਼ਿਕਾਗੋ
ਵਾਲੇ।ਆਹ ਸੰਤ ਨੇ ਲੋਪੋ ਵਾਲੇ , ਨਾਲ ਇਹਨਾਂਦੇ ਬਧਨੀ ਵਾਲੇ,ਔਹ ਸੰਤ ਨੇ ਮਧਨੀ ਵਾਲੇ।ਸੰਤ ਸੁਣੇ
ਸਨ ਰਾੜੇ ਵਾਲੇ , ਉਹ ਆ ਗਏ ਰਤਵਾੜੇ ਵਾਲੇ।ਤੱਪੜੀ ਵਾਲੇ , ਛੱਪੜੀ ਵਾਲੇ , ਰਾੜਾਂ ਅਤੇ ਪਹਾੜਾਂ
ਵਾਲੇ। ਰੋਡੇ ਵਾਲੇ ,ਕੋਡੇ ਵਾਲੇ,ਉਹ ਸੰਤ ਹਨ ਹਰਖੋਪੁਰੀਏ , ਆਹ ਸੰਤ ਨੇ ਸਰਖੋਪੁਰੀਏ,ਚੱਕੀ ਵਾਲੇ ,ਢਕੀ
ਵਾਲੇ ,ਮਿਆਣੀ ਤੇ ਕਲਿਆਣੀ ਵਾਲੇ, ਆਹ ਸੰਤ ਨੇ ਮਾਣਕਪੁਰੀਏ ,ਔਹ ਸੰਤ ਨੇ ਧਾਣਕਪੁਰੀਏ।ਇਹ
ਬਾਬੇ ਢੱਢਰੀਆਂ ਵਾਲੇ, ਨਾਲ ਹੀ ਹਨ ਗੱਡਰੀਆਂ ਵਾਲੇ। ਇਹ ਨੇ ਸੰਤ ਸਹੇੜੀ ਵਾਲੇ, ਉਹ ਆ ਗਏ ਨੇ
ਖੇੜੀ ਵਾਲੇ। ਆਹ ਬਾਬੇ ਬੱਲਾਂ ਵਾਲੇ, ਔਹ ਫਿਰਦੇ ਟੱਲਾਂ ਵਾਲੇ,ਆਹ ਬਾਬਾ ਜੀ ਸਿਧੀ ਵਾਲੇ , ਉਹ ਬਾਬਾ
ਜੀ ਟਿੱਬੀ ਵਾਲੇ।ਆਹ ਸੰਤ ਸਲਵਾਣੇ ਵਾਲੇ, ਉਹ ਸੰਤ ਹਦਵਾਣੇ ਵਾਲੇ। ਐਨੇ ਸੰਤ ਨੇ ਗਿਣੇ ਨਹੀਂ ਜਾਂਦੇ,
ਇਹ ਡੂੰਘੇ ਖੂਹ ਮਿਣੇ ਨਹੀਂ ਜਾਂਦੇ।
ਭੋਲੇ ਲੋਕਾਂ ਨੂੰ ਭਰਮਾ ਕੇ, ਡਾਲਰਾਂ ਉਤੇ ਨਿਗਾਹ ਟਿਕਾ ਕੇ, ਵਿਚ ਵਿਦੇਸ਼ੀਂ ਲਾਉਂਦੇ ਗੇੜੇ,ਮੇਮਾਂ ਰਹਿੰਦੀਆਂ
ਨੇੜੇ ਨੇੜੇ।ਖੂਬ ਦੁਕਾਨਾਂ ਚਲ ਰਹੀਆਂ ਨੇ ਹੋਰ ਦਿਨੋ ਦਿਲ ਫਲ ਰਹੀਆਂ ਨੇ। ਆਓ ਆਪਣੀ ਕਿਰਤ ਸੰਭਾਲੋ
ਇਹਨਾਂ ਬਲਾਵਾਂ ਤਾਈਂ ਟਾਲੋ। ਤੁਹਾਡੇ ਦੁੱਖ ਦਲਿੱਦਰ ਸਾਰੇ ਆਪਣੇ ਆਪ ਹੀ ਦੂਰ ਹੋਣਗੇ,
ਜਦੋਂ ਇਹ ਲੁੱਟਣ ਵਾਲੇ ਸਾਰੇ ਟੋਲੇ ਚਕਨਾਚੂਰ ਹੋਣਗੇ।ੁ--ਪੇਸ਼ਕਾਰ –ਅਮਰਜੀਤ ਢਿੱਲੋਂ